FUMÍ stendur fyrir kvikmyndasýningu í Bíó Paradís á Hverfisgötu á fimmtudagskvöldið, 23. febrúar kl 20.
Sýnd verður eistneska heimildarmyndin, the Measure of man. Myndin er frá árinu 2011 og hefur vakið athygli á erlendum kvikmyndahátíðum.
Eftir sýninguna geta þeir sem vilja sest við spjall undir ölkrús en kaffihús Bíó Paradís býður stóran bjór og vínglas á 600 krónur.
Aðgangur að sýningunni er að kostnaðarlausu – Salurinn tekur 45 manns í sæti – við hvetjum því fólk til að mæta snemma.

Um myndina
Is the environmental crisis really a crisis of environment or is it the crisis of our aspirations, values and habits? We have spent a lot of energy to change the environment to meet our needs, our measure. Now we are prepared to spend even more to avoid the consequences of the changes we have caused. But is it not the time for us to change ourselves? The story of environmental change is not about drought or floods, its characters are not politicians or public spokesmen. It is my story, your story, and the story that connects us both.
The Measure of Man captures the atmosphere of anticipation, and change looming in the air as they are experienced by a well-off lawyer in the rush of Manhattan (NYC, USA), a young barber in ancient town of Hasankeyf in Southern Anatolia, Turkey, a family of fisherman on pictorial Lake Tonle Sap in the heart of Cambodia, and a publisher in the all-eco quarter Vauban in Freiburg in Southern Germany.

http://www.themeasureofman.com/

Efnt verður til hádegishittingsins miðvikudaginn. 26 október milli kl. 12-13. Herlegheitin munu fara fram á efri hæðinni á Glætunni að Laugavegi 19. Við hvetjum félagsmenn til að nýta sér þetta tækifæri til að hittast og ræða málefni líðandi stundar. Kjartan Bollason, nýkjörinn formaður FUMÍ, ætlar að fjalla um alþjóðlega framfarastuðulinn GPI og annars konar aðferðir til að mæla lífsgæði.

Á staðnum verður hægt að panta eitthvað gott í gogginn á vægu verði.
Vonumst til að sjá sem flesta

Á aðalfundi félags umhverfisfræðinga laugardaginn 8. október var kjörin ný stjórn.

Aðalmenn í stjórn voru kjörnir Anna Sigurveig Ragnarsdóttir, Elva Rakel Jónsdóttir , Halla Margrét Jóhannesdóttir og Jón Örvar G. Jónsson. Varamenn voru kjörnir Birna Helgadóttir, Jóna Bjarnadóttir og Hulda Steingrímsdóttir. Kjartan Bollason lektor við ferðamáladeildina á Hólum var kjörin formaður stjórnar.

Hægt er lesa fundargerð aðalfundar FUMÍ hér fyrir neðan

Aðalfundur Félags umhverfisfræðinga á Íslandi

Haldinn í Litlubrekku, Reykjavík, 8. október 2011 kl 16.

Dagný Arnarsdóttir formaður félagsins setti fund.

1. Kosning starfsmanna fundarins

Dagný stakk upp á Gunnari Gunnarssyni sem fundarstjóra og Birni Barkarsyni sem fundarritara og var það samþykkt af fundarmönnum.

2. Skýrsla stjórnar og ársreikningar

Dagný og Guðmundur Hörður kynntu skýrslu stjórnar og var henni dreift á fundinum.

Guðmundur Hörður fór yfir ársreikninga. Gjöld voru alls 397.156 kr og tekjur 626.500 kr. Hagnaður ársins var 427.723 kr. Eigið fé í lok árs var alls 2.020.254 kr. Reikningar voru endurskoðaðir af Ragnhildi Helgu Jónsdóttur og Páli Stefánssyni.

Umræður um skýrslu stjórnar og ársreikninga. Rætt m.a. um innheimtu félagsgjalda og afskriftir ógreiddra félagsgjalda. Fjöldi félagsmanna er nú um 80.

Skýrsla stjórnar og ársreikningar voru borin undir atkvæði og samþykkt samhljóða.

3. Störf nefnda

Íðorðanefnd

Hulda Steingrímsdóttir fór yfir forsögu starfs nefndarinnar. Birna Helgadóttir kynnti síðan starf nefndarinnar. Verkefnið er unnið í samstarfi við Íslenska málstöð. Nefndin hefur hist fimm sinnum og lögð áhersla á að skipuleggja starfið. Gert er ráð fyrir að halda áfram vinnu við skilgreiningar á orðum sem snerta umhverfismál og að leitað verði viðbragða félagsmanna FUMÍ. Markhópar eru margir þ.á.m. þýðendur og kennarar.

Útbúið hefur verið vefsvæði þar sem hægt verður að skoða umhverfisorðin. Í orðalista má sjá samheiti, tillögu að skilgreiningu, dæmi um notkun og ýmsar heimildir. Einnig er sett fram sambærilegt hugtak á erlendu tungumáli.

Allir núverandi nefndarmenn eru tilbúnir að halda áfram. Það eru Birna Helgadóttir, Bergþóra Hlíðkvist Skúladóttir, Ingibjörg Elsa og Stefán Gíslason. Hulda Steingrímsdóttir hefur verið tengiliður nefndarinnar við stjórn.

Rætt var hvernig félagið styðji best við starf nefndarinnar. Einnig að samstarf við stofnun Árna Magnússonar ljái þessu starfi meira gildi og að það öðlist sjálfkrafa viðurkenningu. Meira fjármagn vantar til starfsins.

Lögverndunarnefndin

Nefndin er langt komin í sínu starfi en núverandi nefndarmenn hafa óskað eftir að draga sig í hlé. Óskað var eftir fólki í nefndina og Eygerður Margrétardóttir og Anna Sigurveig Ragnarsdóttir buðu sig fram. Það var samþykkt af fundarmönnum.

3. Lagabreytingar

Engar lagabreytingatillögur bárust.

4. Ályktanir

Guðmundur Hörður Guðmundsson lagði fram eftirfarandi ályktun:

“Aðalfundur Félags umhverfisfræðinga fagnar fram komnum tillögum um að reikna og birta framfarastuðulinn fyrir íslenskt samfélag ár hvert (Genuine Progress Indicator – GPI). Gerðar eru tillögur þess efnis í Sóknaráætlun Ísland 2020 og í nýrri skýrslu nefndar Alþingis um eflingu Græna hagkerfisins. Skyndilegt efnahagslegt hrun í kjölfar mikillar uppsveiflu sýndi fram á að hagvöxtur og verg landsframleiðsla eru einir og sér ófullkomnir mælikvarðar á velgengni þjóða.

Aðalfundur FUMÍ tekur undir það sem segir í Sóknaráætlun Ísland 2020 að ef aukning þjóðartekna er á kostnað hnignunar umhverfis og auðlinda þá getur slík aukning í reynd leitt til minnkunar velsældar. Það er því mikilvægt að bregða upp fleiri mælikvörðum á velsæld en hagvextinum einum saman.

Framfarastuðullinn tekur ýmislegt til greina, t.d. kostnað vegna umhverfisspjalla og ósjálfbæra nýtingu auðlinda og leiðréttir hagvaxtarmælingar með tilliti til þessara þátta auk margra annarra. Ef þjóðarframleiðsla er ekki sjálfbær er vöxtur framfarastuðulsins lægri en vöxtur þjóðarframleiðslu. Það er auk þess skoðun FUMÍ að mæling framfarastuðulsins geti leitt til yfirvegaðri og uppbyggilegri umræðu um efnahags- og atvinnumál í samfélaginu.

FUMÍ hvetur stjórnvöld til að hefja undirbúning útreikninga framfarastuðulsins án tafar svo birta megi mælingar á  framfarastuðlinum svo fljótt sem auðið er.”

Umræður voru um ályktunina og m.a. spurt hvort GPI væri endilega rétti mælikvarðinn og hvort ekki mætti mæla almennt með öðrum mælikvörðum en hagvexti á velgengni og velferð. Einnig var rætt hvort nægilega góðar upplýsingar til útreiknings GPI stuðulsins væru til staðar eða safnað af t.d. Hagstofunni. Nefnt var að Human development Index (HDI) væri einnig notað í þessum tilgangi af alþjóðlegum stofnunum.

Fram kom eftirfarandi breytingatillaga:

“Aðalfundur Félags umhverfisfræðinga fagnar fram komnum tillögum um að reikna og birta alþjóðlegan framfarastuðul fyrir íslenskt samfélag ár hvert (Genuine Progress Indicator – GPI). Gerðar eru tillögur þess efnis í Sóknaráætlun Ísland 2020 og í nýrri skýrslu nefndar Alþingis um eflingu Græna hagkerfisins. Skyndilegt efnahagslegt hrun í kjölfar mikillar uppsveiflu sýndi fram á að hagvöxtur og verg landsframleiðsla eru einir og sér ófullkomnir mælikvarðar á velgengni þjóða.

Aðalfundur FUMÍ tekur undir það sem segir í Sóknaráætlun Ísland 2020 að ef aukning þjóðartekna er á kostnað hnignunar umhverfis og auðlinda þá getur slík aukning í reynd leitt til minnkunar velsældar. Það er því mikilvægt að bregða upp fleiri mælikvörðum á velsæld en vergri þjóðarframleiðslu og hagvexti.

Framfarastuðullinn tekur ýmislegt til greina, t.d. kostnað vegna umhverfisspjalla og ósjálfbæra nýtingu auðlinda og leiðréttir hagvaxtarmælingar með tilliti til þessara þátta auk margra annarra. Ef þjóðarframleiðsla er ekki sjálfbær er vöxtur framfarastuðulsins lægri en vöxtur þjóðarframleiðslu. Það er auk þess skoðun FUMÍ að mæling framfarastuðulsins geti leitt til yfirvegaðri og uppbyggilegri umræðu um efnahags- og atvinnumál í samfélaginu.

FUMÍ hvetur stjórnvöld til að hefja undirbúning útreikninga framfarastuðulsins án tafar svo birta megi mælingar á  framfarastuðlinum svo fljótt sem auðið er.”

Breytingatillagan var borin undir atkvæði og samþykkt samhljóða.

5. Kjör stjórnar

Fundarstjóri óskaði eftir framboðum til formennsku og stjórnarsetu en engin slík framboð höfðu borist fyrir fundinn. Fyrir lá að sex aðal- og varamenn ætluðu ekki að gefa kost á sér áfram.

Kjartan Bollason gaf kost á sér í formennsku og var kjörinn formaður samhljóða.

Eftirfarandi voru kjörnir aðalmenn í stjórn:

Anna Sigurveig Ragnarsdóttir, Elva Rakel Jónsdóttir, Halla Margrét og Jön Örvar G Jónsson.

Til vara voru kjörnir:

Birna Helgadóttir, Jóna Bjarnadóttir og Hulda Steingrímsdóttir.

Skoðunarmenn voru kjörnar:

Helga Rakel Guðrúnardóttir og Ragnhildur Helga Jónsdóttir

6. Önnur mál

Skipan í lagabreytingarnefnd:

Henni var haldið óbreyttri að ósk sitjandi nefndarmanna.

Félagsgjöld:

Tillaga kom fram um að þau yrðu óbreytt. Tillagan var samþykkt samhljóða.

7. Hvernig tölum við um umhverfið?

Bergþóra Njála Guðmundsdóttir fjallað um umhverfismál á mannamáli. Hún ræddi glímuna við orðin og hvernig hægt væri að brjótast út úr viðjum sérfræðimálsins. Tenging við daglegt líf fólks væri lykillinn að því að koma skilaboðum til skila. Oft væri markmið orðræðunnar að tryggja trúverðugleika innan fræðasamfélagsins. Slíkt er ekki bundið við umhverfismál.

Umræður voru um erindi Bergþóru.

Guðni Elísson fjallaði um loftslagsumræðuna, einkum vestan hafs. Henni mætti skipta í fernt:

· Hrakspárumræðan. Allt að fara til fjandans. Tungumálið væri “kvikmyndakóðað”. Mjög áhrifaríkar myndlíkingar. Tengist mjög náið trúarbrögðum.

· Velsældarorðræðan. Skapaður ótti við að missa eitthvað. Einnig fjallað um tækifærin í loftslagsbreytingunum.

· Tæknilegar lausnir. Hægt að leysa vandamál, ef þau skyldu vera til staðar, með tæknilegum lausnum. “Geo engineering”.

· Mælskufræðileg efahyggja. Byggist á að grafið er undan niðurstöðum loftslagsrannsókna. Notuð hugtök eins og “efnahagslegar afleiðingar”, “deilt um grundvallaratriði”, og varað við vísindahroka. Einnig, er loftslagsumræðan pólitískt samsæri vinstrimanna sbr “Green is red”? Efasemdarmenn stilla sér upp sem píslarvottum, “hinir ofsóttu unnendur sannleikans”. Má rekja áhugaleysi almennings til ávanabindingar eða hættulegrar fíknar neyslunnar (Carbon habit)?

Dagný, sem á þessu stigi hafði tekið við fundarstjórn, sleit fundi

Björn H. Barkarson,

fundarritari

Ályktun frá aðalfundi félags umhverfisfræðinga á Íslandi

,,Aðalfundur Félags umhverfisfræðinga fagnar fram komnum tillögum um að reikna og birta alþjóðlegan framfarastuðul fyrir íslenskt samfélag ár hvert (Genuine Progress Indicator – GPI). Gerðar eru tillögur þess efnis í Sóknaráætlun Ísland 2020 og í nýrri skýrslu nefndar Alþingis um eflingu Græna hagkerfisins. Skyndilegt efnahagslegt hrun í kjölfar mikillar uppsveiflu sýndi fram á að hagvöxtur og verg landsframleiðsla eru einir og sér ófullkomnir mælikvarðar á velgengni þjóða.

Aðalfundur FUMÍ tekur undir það sem segir í Sóknaráætlun Ísland 2020 að ef aukning þjóðartekna er á kostnað hnignunar umhverfis og auðlinda þá getur slík aukning í reynd leitt til minnkunar velsældar. Það er því mikilvægt að bregða upp fleiri mælikvörðum á velsæld en vergri þjóðarframleiðslu og hagvexti.

Framfarastuðullinn tekur ýmislegt til greina, t.d. kostnað vegna umhverfisspjalla og ósjálfbæra nýtingu auðlinda og leiðréttir hagvaxtarmælingar með tilliti til þessara þátta auk margra annarra. Ef þjóðarframleiðsla er ekki sjálfbær er vöxtur framfarastuðulsins lægri en vöxtur þjóðarframleiðslu. Það er auk þess skoðun FUMÍ að mæling framfarastuðulsins geti leitt til yfirvegaðri og uppbyggilegri umræðu um efnahags- og atvinnumál í samfélaginu.

FUMÍ hvetur stjórnvöld til að hefja undirbúning útreikninga framfarastuðulsins án tafar svo birta megi mælingar á  framfarastuðlinum svo fljótt sem auðið er.”

Ágætu félagar,

Aðalfundur Félags umhverfisfræðinga verður haldinn laugardaginn 8. október, kl. 16.00. Hann mun fara fram í salarkynnum Litlubrekku, Bankastræti 2, 101 Reykjavík (Lækjarbrekka).

Að loknum hefðbundnum aðalfundarstörfum fara fram umræður og er yfirskrift þeirra: Hvernig tölum við um umhverfið?

Dagskrá

Dagskrá fundarins er eftirfarandi:

1.       Setning og kosning starfsmanna fundarins

2.       Skýrsla stjórnar

3.       Ársreikningur

4.       Starf lögverndunarnefndar

5.       Lagabreytingar

6.       Ályktanir

7.       Kosning stjórnar, varamanna og skoðunarmanna reikninga

8.       Önnur mál

9.       Þema: Hvernig tölum við um umhverfið?

10.     Fundarslit

Að loknum fundi fer fram sameiginlegt borðhald.

Lagabreytingar

Þeir sem vilja leggja fram lagabreytingatillögur geta haft samband við lagabreytinganefnd sem aðstoðað getur við tillögugerð. Breytingatillögur þurfa að berast skriflega til ritara FUMÍ ( This e-mail address is being protected from spambots, you need JavaScript enabled to view it ) fyrir 1. október nk. Núverandi lög, sem og upplýsingar um lagabreytinganefnd, er að finna á heimasíðu félagsins www.umhverf.is undir efnisflokknum “Félagið”.

Framboð

Við hvetjum félagsmenn til taka virkan þátt í störfum félagsins og hvetja aðra félagsmenn til að gera slíkt hið sama. Mörg spennandi embætti eru í boði þar sem fimm núverandi stjórnmeðlimir hafa ákveðið að draga sig í hlé, þar á meðal formenn félagsins. Hér því gott tækifæri fyrir áhugasama að koma að stjórnun félagsins og hafa áhrif. Ekki þarf að tilkynna framboð með fyrirvara; hægt er að bjóða sig fram á sjálfum aðalfundi. Framboð geta einnig borist í tölvupósti til ritara sem kemur þeim á framfæri við aðalfund. Athugið að kjörgengi og kosningarétt hafa eingöngu gildir og skuldlausir félagsmenn. Við hvetjum áhugasama til að sækja um aðild að félaginu á allra næstu dögum með því að senda tölvupóst þar að lútandi, sem og forsíðu prófskírteinis, til formanns ( This e-mail address is being protected from spambots, you need JavaScript enabled to view it ) og/eða gera upp félagsgjöld sín hjá gjaldkera ( This e-mail address is being protected from spambots, you need JavaScript enabled to view it ).

Þátttaka í borðhaldi

Eftir fundinn býður félagið upp á fordrykk og að honum loknum verður sameiginlegt borðhald. Hægt er að skrá sig í tveggja rétta máltíð í Litlubrekku sem kostar 3.900 kr. Þeir sem vilja taka þátt borðhaldinu þurfa að láta stjórn FUMÍ vita í síðasta lagi þann 3. október hjá gjaldkera félagsins ( This e-mail address is being protected from spambots, you need JavaScript enabled to view it ). Þeir sem taka grænmeti fram yfir kjöt þurfa að tilgreina það. Makar eru að sjálfsögðu velkomnir.

Við hlökkum til að hitta ykkur öll laugardaginn 8. október!

Bestu kveðjur,

Stjórn FUMÍ

FUMÍ fagnar þeirri þróun innan stjórnsýslunnar að umhverfis- og auðlindamál séu skoðuð í samhengi við hvort annað. Eins og nafnið gefur til kynna mun úrskurðarnefndin hafa umtalsvert vald þegar kemur að þessum víðtæka og mikilvæga málaflokki og því brýnt að menntun, þekking og reynsla nefndarmanna verði fjölbreytt og nái yfir þau fagsvið sem nefndin fæst við. Athugasemdir FUMÍ varðandi frumvarp þetta (709. mál) lúta því fyrst og fremst að menntun nefndarmanna í úrskurðarnefnd umhverfis- og auðlindamála, 2. gr. frumvarpsins.

Stjórn félagsins hefur nú fjallað um frumvarpið og gerir eftirfarandi athugasemdir:

Í 2. gr. frumvarpsdraganna er nefndarskipan lýst. Þar kemur fram að forstöðumaður og staðgengill hans, skipaðir til fimm ára, skulu báðir vera löglærðir (skulu báðir uppfylla starfsgengisskilyrði héraðsdómara). Aðrir nefndarmenn, skipaðir til fjögurra ára í senn, skulu allir hafa háskólapróf. Hæstaréttur tilnefnir fjóra; einn með sérþekkingu á sviði  skipulagsmála, einn á sviði byggingarmála og einn á sviði umhverfismála, og einn með embættispróf í lögfræði eða annað jafngilt háskólapróf. Loks tilnefnir sjávarútvegs- og  landbúnaðarráðherra einn nefndarmann sem skal hafa háskólapróf og sérþekkingu á sviði fiskifræði og/eða veiðimála og iðnaðarráðherra einn sem skal hafa háskólapróf og sérþekkingu á sviði orkumála og/eða jarðvísinda. Sama gildir um varamenn.

Til að tryggja réttan skilning stjórnar FUMÍ á frumvarpinu sendi formaður inn fyrirspurn til nefndasviðs Alþingis, en fyrirspurnin varðaði lágmarks menntun sérfræðings á sviði umhverfismála eins og höfundar frumvarps túlkuðu hana. Í svarinu, sem barst þann 4.5.2010, kom fram að „[...] [s]amkvæmt upplýsingum umhverfisnefndar var það vilji nefndarinnar sem samdi frumvarpið að ekki yrði gerð krafa um tiltekna gráðu heldur háskólapróf (getur verið BA gráða) og þekkingu sem viðkomandi getur t.d. hafa öðlast með starfsreynslu að loknu háskólaprófi. Með þessu fyrirkomulagi er ekki verið að útiloka t.d. verkfræðinga eða náttúruvísindafólk sem ekki hafa í sínu námi lagt sérstaka áherslu á „umhverfisfræði“ en unnið að slíkum málum t.d. í starfi sínu eftir háskólanám.“

FUMÍ  bendir á að ekki er gerð krafa um a) framhaldsnám (þ.e. lokin gráða) og b) háskólamenntun á því sviði sem um ræðir. Krafa um meistaragráðu virðist eingöngu eiga við lögfræði. FUMÍ vill auk þess benda á að við tilnefningar Hæstarétts getur myndast mikil slagsíða í átt til löglærðra nefndarmanna og leggur til að gerð verði krafa um fleiri tegundir menntunar. Félagið gerir þó ekki að öðru leyti athugasemdir við að Hæstiréttur tilnefni nefndarmenn sé, eins og áður sagði, tryggt að menntun nefndarmanna verði fjölbreytt og nái yfir helstu fagsvið sem nefndin fæst við.

Félagið leggur ennfremur til að einn hinna tilnefndu nefndarmanna Hæstarétts sé með háskólapróf í umhverfisfræðum eða umhverfis- og auðlindafræðum, og vísar í skilgreiningu félagsins á því hvað felist í háskólamenntun umhverfisfræðings. Í lögum félagsins segir að umhverfisfræðingar séu þeir sem hafa lokið viðurkenndri prófgráðu frá háskóla eða hliðstæðri menntastofnun í umhverfisfræðum eða skyldum greinum, s.s. umhverfis- og auðlindastjórnun og þeir sem hafa lokið a.m.k. BA, BS eða samsvarandi gráðu úr háskóla í annarri fræðigrein og að auki sem samsvarar 60 einingum (ECTS) á sviði þverfaglegra umhverfisfræða. Félagið telur að háskólapróf í verkfræði, náttúruvísindum eða lögfræði auk starfsreynslu nýtist ekki á sama hátt og háskólapróf í umhverfisfræðum við vandaða og faglega umfjöllun um þátt umhverfisins innan úrskurðarnefndar um umhverfis- og auðlindamál.

Fyrir hönd stjórnar FUMÍ,

 Dagný Arnarsdóttir, formaður